Gagauziyada kutlanȇr Ana dilimizin günü

Her yıl, çiçek ayın 27-da Gagauziyada kutlanȇr Ana dilimizin günü. Bu yortu bakılêr Mihail Çakirin duumа günündӓ.

Halkımızın dili – gagauz dili. Bu dil – bizim ana dilimiz. O bizä en paalı, çünkü bu dildä dädularımız, malilerimiz, analarımız hem bobalarımız, kardaşlarımız hem kakularımız lafederlär. Bizim borcumuz – onu korumaa, desteklemää, ilerletmää, kaldırmaa taa üüsek uura.

Bir halkın gözellii çekiler onun istoriyasından,dilindän hem kulturasından, angısında o lafeder, binnärcä yıllardan gelän hem evlatboyundan evlatboyuna geçän adetlerindän hem sıralarından.

Büün Kultura hem Dil oldular önemni instrument halkın ruh korumasında.Gagauz halkı var neylän girginnensin — incäzanaatımız, kulturamız yaşêêr.

Gagauzlar korudular folklorunu, adetlerini, giimnerini — o özellikleri, angıları belli ederlär gagauzluumuzu. Gagauz diliniüürenerlär uşak başçalarında, şkolalarda, neredä onnar tanışêrlar gagauz yazıcıların yaratmalarınnan; çalışêr kultura evleri, neredä folklor kolektivleri gagauz halk türkülerindä çalêrlar; muzeylerdä — gagauz dilindä meraklı sergilär düzülerlär; yıl-yıldan biblioteka fondları zeedelener gagauz dilindä tiparlanan kiyatlarlan: muzıka okullarında uşaklar gagauz halk instrumentlerindä çalmaa üürenerlär; resim şkolalarında gagauz resimcilerin yaratmalarınnan tanışêrlar; gagauz milli yortuları«Hederlez», «Kasım» geçiriler, «Ana dili» yortumuz kutlanılêr. Biz girgin ilerlederiz çalışmamızı – gagauz halkın kulturasını hem dilini üüsek uura kaldırmaa, tanıtmaa onu yabancı topraklarda, başka türk halklarınnan barabar.